მართლწესრიგის ოფიცრის საქმიანობის შესახებ
1. რა არის საზოგადოებაზე ორიენტირებული საპოლიციო საქმიანობა?
- საზოგადოებაზე ორიენტირებული საპოლიციო საქმიანობა გულისხმობს მოსახლეობასა და პოლიციას შორის პარტნიორობის გაღრმავებას და დანაშაულის პრევენციას საზოგადოების წევრებისა და შესაბამისი უწყებების ჩართულობით. მართლწესრიგის ოფიცერი სწორედ საპოლიციო მოდელის ნაწილია, რომლის მიზანია საზოგადოებასა და პოლიციას შორის მჭიდრო კომუნიკაციის დამყარება, პარტნიორული ურთიერთობის გაძლიერება, დანაშაულისა და სამართალდარღვევის პრევენცია.
2. რას საქმიანობს მართლწესრიგის ოფიცერი და რა არის მისი უშუალო ფუნქცია-მოვალეობები?
- მართლწესრიგის ოფიცრის საქმიანობის მთავარი მიზანი არის დანაშაულის პრევენცია, მისი საქმიანობის ძირითადი სფეროებია: დანაშაულისა და სამართალდარღვევის ხელშემწყობი ფაქტორების იდენტიფიცირება და მათი აღმოფხვრის მიზნით, პრევენციული ღონისძიებების დაგეგმვა/განხორციელება; დანაშაულზე ან/და სამართალდარღვევაზე წასწრებისას, კანონით გათვალისწინებული გადაუდებელი ღონისძიებების განხორციელება; ქალთა მიმართ ან/და ოჯახში ძალადობის ფაქტებზე რეაგირება, ამასთან დაკავშირებით, შემაკავებელი ორდერების გამოცემა. შემაკავებელი და დამცავი ორდერების მონიტორინგი. სამეზობლო კონფლიქტებზე რეაგირება, მათი თავიდან აცილების მიზნით, შესაბამისი პრევენციული პროექტების/ინიციატივების შემუშავება და განხორციელება; ბავშვთა უმეთვალყურეოდ დატოვების და არასრულწლოვანთა მიერ/მიმართ ჩადენილი დანაშაულის პრევენციის მიზნით, შესაბამისი ღონისძიებების დაგეგმვა-განხორციელება; დისკრიმინაციული ნიშნით, შეუწყნარებლობის მოტივით, ჩადენილი დანაშაულის პრევენციის მიზნით, შესაბამისი ღონისძიებების დაგეგმვა-განხორციელება; საქართველოში კანონიერი საფუძვლის გარეშე მყოფი უცხოელების გამოვლენა, ამ მიმართულებით, კანონით გათვალისწინებული ზომების მიღება. მართლწესრიგის ოფიცრის უფლება-მოვალეობებს დეტალურად შეგიძლიათ გაეცნოთ შინაგან საქმეთა მინისტრის ბრძანებებით.
3. როგორ დავუკავშირდე მართლწესრიგის ოფიცერს?
- თქვენ შეგიძლიათ მართლწესრიგის ოფიცერს პირადად მიმართოთ მათ სამოქმედო სექტორზე, ქვეითად პატრულირების დროს ან შესაბამის განყოფილებაში. ასევე არსებობს ტელეფონზე და ინტერნეტის მეშვეობით დაკავშირების შესაძლებლობაც. მართლწესრიგის ოფიცრების საზოგადოებასთან დაახლოებისა და ინტენსიური კომუნიკაციის მიზნით, შეიქმნა Facebook-გვერდი (მართლწესრიგის ოფიცერი) და მიმდინარეობს ასევე ვებ-გვერდის (officer.ge) დახვეწა, სადაც განთავსებულია ცალკეული მართლწესრიგის ოფიცრების ინდივიდუალური პროფილები და ყველა მოქალაქეს შესაძლებლობა აქვს იპოვოს მის ტერიტორიაზე მომუშავე მართლწესრიგის ოფიცერი, დაუკავშირდეს მას და მიაწოდოს ინფორმაცია ნებისმიერი დანაშაულის ან სამართალდარღვევის შესახებ.
მართლწესრიგის ოფიცრობის მსურველთათვის
4. სად შემიძლია მოვიძიო ინფორმაცია მართლწესრიგის ოფიცრის ვაკანსიაზე?
- მართლწესრიგის ოფიცრის ვაკანსიებზე ინფორმაცია შეგიძლიათ მოიძიოთ hr.police.ge.
5. როგორია მართლწესრიგის ოფიცრის ვაკანტურ თანამდებობაზე დანიშვნის პროცესი?
- თუ თქვენ გსურთ გახდეთ მართლწესრიგის ოფიცერი, ძირითადი (საკონკურსო) მოთხოვნაა უმაღლესი განათლება მიუხედავად, პროფესიისა. თუმცა, სასურველია იურიდიული განათლება, აგრეთვე, მართვის მოწმობის ფლობა და უცხო ენის ცოდნა. ამასთანავე, მართლწესრიგის ოფიცრის კანდიდატისთვის მნიშვნელოვანია კომუნიკაციის და მედიაციის უნარები. შერჩევის პროცესი შედგება რამდენიმე ეტაპისაგან, კერძოდ: განაცხადის ფორმის საფუძველზე შესაბამისი კანდიდატების გადარჩევა; უნარ-ჩვევების ტესტი/IQ ტესტირება; გასაუბრება; ფიზიკური მომზადებისა და ჯანმრთელობის მდგომარეობის შემოწმება; მართლწესრიგის ოფიცრის სპეციალური პროფესიული საგანმანათლებლო პროგრამის წარმატებით დასრულება. აქვე უნდა აღინიშნოს, რომ მსურველთა მოტივირების მიზნით ის კანდიდატები, რომლებიც წარმატებით გაივლიან შერჩევის ეტაპებს პოლიციის აკადემიაში სწავლის დაწყებამდე ინიშნებიან მართლწესრიგის ოფიცრის პოზიციაზე და სწავლის პროცესში იღებენ თანამდებობრივი სარგოს ნახევარს.
6. როდის და რა ფორმით შევიტყობ ინფორმაციას ჩემს მიერ საკვალიფიკაციო ეტაპების გავლის შესახებ?
- საკონკურსო ეტაპის გავლის შემთხვევაში გაცნობებთ, კანდიდატთა შერჩევის პროცესის დასრულების შემდეგ, თქვენს მიერ მითითებული ინფორმაციის მეშვეობით.
7. მაქვს სრული ზოგადი განათლება, ამჟამად ვარ სტუდენტი, მართლწესრიგის ოფიცრის ვაკანსიაზე განცხადების გაკეთება შემიძლია?
- არა. აუცილებელია უმაღლესი განათლების დამადასტურებელი დიპლომის ან დიპლომის შესახებ ცნობის წარდგენა.
8. ვებ. გვერდზე www.hr.police.ge, რა ფორმატით უნდა აიტვირთოს მოთხოვნილი დოკუმენტები?
- გთხოვთ, გაითვალისწინოთ რომ ვებ. გვერდი www.hr.police.ge მოთხოვნილ დოკუმენტებს მხოლოდ იღებს JPG (.jpg) ფორმატის, ე.წ. სურათის სახით. სხვა ფორმატით არც ერთი დოკუმენტის წარმოდგენა ვერ ხდება სააპლიკაციო განაცხადში.
9. რატომ არ შეიძლება ერთი და იმავე ერთი და იგივე დანაყოფში წარადგინოს ერთზე მეტი განცხადება/აპლიკაცია კანდიდატმა?
- საქართველოს შინაგან საქმეთა მინისტრის N995 ბრძანების თანახმად, კანდიდატი უფლებამოსილია ერთი და იგივე დანაყოფში წარადგინოს მხოლოდ ერთი განცხადება/აპლიკაცია.
10. ვინ შეიძლება მივუთითოთ რეკომენდატორის ველში?
- რეკომენდატორის ველში უნდა მოხდეს მითითება პირის, რომელიც დაადასტურებს კანდიდატის პროფესიულ თუ საგანმანათლებლო უნარ-ჩვევებს, სასურველია რეკომენდატორად მითითებულ იქნას საქართველოს შინაგან საქმეთა სამინსიტროს თანამშრომელი.
11. როგორ გავიგებ გადავლახე თუ არა გასაუბრების ეტაპი?
- კანდიდატი, რომელიც გადალახავს გასაუბრების ეტაპს, შსს-ს შესაბამისი თანამშრომელი, დადებითი პასუხის შემთხვევაში, დაუკავშირდება მის მიერ სააპლიკაციო განაცხადში მითითებულ საკონტაქტო ინფორმაციაზე.
12. ხდება თუ არა გამოგზავნილი აპლიკაციის ხელახლა ან წინასწარ გადახედვა კანდიდატის სურვილის შემთხვევაში?
- გთხოვთ გაითვალისწინოთ, რომ კანდიდატის მიერ შევსებული განაცხადი გაივლის ყველა საქართველოს კანონმდებლობით გათვალისწინებულ პროცედურებს, და არ არის საჭირო კანდიდატის დაკავშირება შსს-ს ადამიანური რესურსების მართვის დეპარტამენტთან აპლიკაციის წინასწარ ან გამოგზავნის შემდგომ გადახედვის მოთხოვნით.
